“Premium Bank” özünüməşğulluq proqramına dəstəyi davam etdirir

Özünüməşğulluq proqramının prioritet məqsədi ölkədə əhalinin həssas qruplarının (əlilliyi olan şəxslərin, aztəminatlı ailələrin, şəhid ailələrinin, məcburi köçkünlərin, işsiz və işaxtaran şəxslərin və b.) məşğulluğunun artırılması və kiçik sahibkarlığa çıxışının dəstəklənməsində əlavə imkanlar yaratmaqdır. Bank tərəfindən, proqrama qoşulan Bakı və Sumqayıt şəhərlərində yaşayan, həssas əhali qrupuna aid vətəndaşlara avtoyuma, bərbər və dərzi xidmətləri üzrə kiçik bizneslərinin qurulmasına, həmçinin inkişafına təkan verəcək xüsusi avadanlıqlar təqdim edilib.

Belə ki, dərziçilik peşəsi ilə məşğul olan Şahbazova Şəhla, Səfərova Gülnaz, İlyasova Gülşən, Əmirli Anar və Qasımlı Gülarə fəaliyyətləri üçün lazım olan avadanlıqlar alınaraq təhvil verilib. Həmçinin, avtoyuma və bərbər peşəsi ilə məşğul olan Quliyev Fərhad, Kamulova Sənayə və Dünyamalıyeva Mənzərə lazımi avadanlıqlar alınıb və təhvil verilib.

Onu da qeyd etməliyik ki, özünüməşğulluq proqramı hazırda koronavirus (COVID-19) pandemiyası ilə əlaqədar ölkədə sosial-iqtisadi vəziyyətin yaxşılaşdırılması istiqamətində atılan mühüm addım olaraq əhalinin əmək məhsuldarlığının, iqtisadi fəaliyyətinin, ailə gəlirlərinin artmasına və əlavə iş yerlərinin yaranmasına zəmin yaradacaqdır.

Əmək və Əhalinin Sosial Müdafiəsi Nazirliyi, Mərkəzi Bank və Azərbaycan Banklar Assosiasiyası arasında imzalanmış Memorandumun icrasını həyata keçirən Premium Bank ilin sonunadək ölkənin fərqli regionlarında aztəminatlı vətəndaşların aktivlərlə təmin edilməsini davam etdirəcək.

Bütün proqram iştirakçılarını təbrik edir və gələcək işlərində uğurlar arzulayırıq!

Bankın məhsul və xidmətləri barədə daha ətraflı məlumat almaq üçün www.premiumbank.az saytına, (012) 931 Sorğu Mərkəzinə və ya Bankın rəsmi “Facebook” səhifəsinə www.fb.com/premiumbank.az müraciət edə bilərsiniz.